Progress, nuqqasijiet, u esperjenzi: l-isport jirrifletti l-isfidi tan-nisa fis-soċjetà
Diskussjoni pubblika bħala parti mill-Ġimgħa Ewropea tal-Ugwaljanza bejn il-Ġeneri tal-PE
L-Uffiċċju ta’ Kollegament tal-Parlament Ewropew (EPLO) fil-Belt Valletta, flimkien ma’ SHE – Social Hub Entrepreneurs, illum organizza “Level the Playing Field: Women, Talent and Sport”, avveniment iddedikat għall-avvanz tal-ugwaljanza bejn il-ġeneri fl-isport. Id-diskussjoni tal-panel kienet waħda minn diversi inizjattivi madwar l-Ewropa hekk kif il-Parlament Ewropew immarka l-Ġimgħa Ewropea tal-Ugwaljanza bejn il-Ġeneri.
Il-parteċipanti ntlaqgħu b’messaġġ bil-vidjo mill-President tal-Parlament Ewropew Roberta Metsola, li enfasizzat ir-responsabbiltà kondiviża li jitneħħew l-ostakli li fadal għan-nisa, mhux biss fl-isport iżda kull fejn jeżistu soqfa tal-ħġieġ.
It-tfittxija ta’ mezzi ekwi biex jiġi żgurat aċċess għall-isport fil-livelli kollha kienet tema rikorrenti. George Micallef, id-Direttur tal-Iżvilupp u r-Reklutaġġ tal-Isport fil-Kulleġġ Mediterranju tal-Isport, enfasizza l-importanza li jiġu indirizzati l-bżonnijiet speċifiċi tal-bniet u s-subien, partikolarment lejn perkors ta’ karriera doppja. L-istatistika tidher li tissuġġerixxi li l-bniet f’Malta persistentement jitilqu mill-isport partikolarment f’nofs l-adolexxenza tagħhom, argumentabbilment hekk kif jagħmlu tranżizzjoni għall-edukazzjoni postsekondarja u possibbilment jiffokaw fuq l-iżvilupp akkademiku u professjonali tagħhom.
Il-psikologa tal-isport Jasmine Borg qasmet l-esperjenza tagħha - kif inhi dik ta’ ħafna oħrajn - li kellha tgħaddi minn għażliet bħal dawn. Dan spiss joħloq ansjetà u fl-aħħar mill-aħħar jagħmel ħsara lill-prestazzjoni sportiva. L-indirizzar tas-saħħa tan-nisa fl-isport jista’ jkun għadu tabù, qalet, filwaqt li nnotat li l-atleti jeħtieġu kura olistika, kemm fiżika kif ukoll psikoloġika.
Il-powerlifter u studenta tal-liġi Laura Chetcuti Dimech iddeskriviet il-bidu tal-vjaġġ sportiv tagħha fil-futbol u aktar tard fi sport individwali, fejn enfasizzat is-saħħa tal-individwu biex jiġġieled l-ostakli li jiltaqa' magħhom, kemm jekk relatati mal-ġeneru jew le.
Il-Kowċ tat-Tim Nazzjonali tal-Futbol tan-Nisa Manuela Tesse enfasizzat il-ħtieġa għal approċċi ta’ kowċing li jifhmu kemm il-fiżjonomija kif ukoll il-mentalità tal-atleti nisa. Hija wissiet li n-nisa spiss iħossu li jridu “jiġġieldu l-ħin kollu” biex jiżguraw li jieħdu opportunitajiet li ħaqqhom.
Il-panel enfasizza wkoll in-nuqqas ta’ rappreżentanza femminili fil-midja sportiva kif ukoll fil-ġestjoni sportiva. Id-diskussjoni, moderata minn Joanna Camilleri, ġurnalista sportiva u eks judoka nazzjonali, saħħet il-messaġġ li l-progress reali jeħtieġ kollaborazzjoni: minn dawk li jfasslu l-politika u l-edukaturi sal-familji, il-klabbs u l-organizzazzjonijiet tal-midja.
Hekk kif l-Ewropa tfakkar il-Ġimgħa tal-Ugwaljanza bejn il-Ġeneri, l-għarfien miġbur illum se jiġi mgħoddi lill-Membri tal-Parlament Ewropew biex jgħin jiggwida l-azzjoni futura tal-UE f’dan il-qasam.
Waqt li introduċa l-avveniment, Dr Mario Sammut, il-Kap tal-Uffiċċju tal-PE fil-Belt Valletta, enfasizza r-rwol tal-uffiċċju biex iservi bħala pont bejn il-partijiet interessati f’Malta u r-rappreżentanti tagħhom fil-Parlament Ewropew, u b’hekk jikkontribwixxi għat-tfassil tal-politika tal-UE li għaddej bħalissa.
Sarah Woods, id-Direttriċi ta’ SHE – Social Hub Entrepreneurs, iddeskriviet lil SHE bħala komunità dejjem tikber ta’ imprendituri nisa, professjonisti u oħrajn minn oqsma differenti tal-ħajja impenjati li jmexxu l-bidla fil-politika u jispiraw azzjoni. Hija enfasizzat li minkejja l-progress, “id-diskrepanzi bejn is-sessi fl-isport għadhom viżibbli u persistenti.”
Sfond
Din il-ġimgħa, il-Parlament Ewropew adotta rapport li jappella lill-UE biex ikollha strateġija ambizzjuża dwar l-ugwaljanza bejn il-ġeneri bbażata fuq miżuri leġiżlattivi prattiċi. Matul l-istess sessjoni plenarja, il-Parlament beda l-proċedura leġiżlattiva biex jemenda l-Att Elettorali tal-UE biex jippermetti drittijiet ta’ vot bi prokura għall-Membri Parlamentari Ewropej nisa qabel u wara t-twelid, u b’hekk jallinja r-regoli tal-votazzjoni mal-isfidi tas-saħħa u l-kura fil-ħajja reali u jiżgura li l-ommijiet ikunu jistgħu jipparteċipaw bis-sħiħ fil-ħajja politika.
