Studenti jirriflettu fuq il-valuri Ewropej f’kompetizzjoni tar-ritratti għall-10 anniversarju tal-EPAS
L-istudenta rebbieħa hija Sophie Ditzel Pritsker minn St Martin's College
Sabiex jiċċelebra l-10 anniversarju tal-Programm Skejjel Ambaxxaturi tal-Parlament Ewropew (EPAS), l-Uffiċċju ta’ Kollegament tal-Parlament Ewropew f’Malta organizza kompetizzjoni nazzjonali tar-ritratti. Din il-kompetizzjoni stiednet lill-istudenti jwieġbu mistoqsija sempliċi iżda sinifikanti: “Xi tfisser l-Ewropa għalik?”
Permezz tal-fotografija u deskrizzjonijiet qosra, l-istudenti kienu mħeġġa jesprimu l-fehmiet tagħhom fuq il-valuri Ewropej, l-identità u l-kooperazzjoni. L-inizjattiva ċċelebrat deċennju ta’ attivitajiet tal-EPAS f’Malta, filwaqt li rrinforzat l-għan tal-programm, li jħeġġeġ liż-żgħażagħ isiru ċittadini infurmati, attivi u involuti.
Parteċipazzjoni b’saħħitha mill-iskejjel tal-EPAS
Il-kompetizzjoni attirat 24 sottomissjoni mill-iskejjel tal-EPAS madwar Malta, li kollha ssodisfaw ir-rekwiżiti ta’ eliġibbiltà. L-iskejjel li ħadu sehem kienu l-Kulleġġ De La Salle, il-Junior College, il-Kulleġġ Maria Regina – Lily of the Valley, il-Kulleġġ Santu Wistin, il-Kulleġġ Santa Klara Sir Adrian Dingli, St Dorothy’s Senior School, St Joseph Senior School, St Martin’s College u l-Kulleġġ San Injazju.
L-istudenti esploraw temi bħall-identità Ewropea, id-diversità kulturali, is-sostenibbiltà u s-solidarjetà, filwaqt li enfasizzaw kif iż-żgħażagħ jipperċepixxu l-Ewropa u r-rwol tagħhom fiha.
It-timijiet rebbieħa
Wara proċess ta’ evalwazzjoni mwettaq minn ġurija, tħabbru r-rebbieħa tal-kompetizzjoni:
- L-Ewwel Post – St Martin’s College
- It-Tieni Post – Il-Junior College
- It-Tielet Post – Il-Junior College
Opportunità li jirrappreżentaw lil Malta fi Brussell
Bħala rikonoxximent tal-kisba tagħhom, studenti minn St Martin’s College se jirrappreżentaw lill-Programm EPAS f’Malta fis-Seminar taż-Żgħażagħ għall-10 Anniversarju tal-EPAS, li se jsir fil-Parlament Ewropew fi Brussell fit-18 ta’ Marzu. Id-delegazzjoni Maltija se tinkludi l-istudenta rebbieħa, edukatur li jakkumpanjaha u żewġ studenti oħra mill-iskola.
Matul is-seminar, il-parteċipanti se jiltaqgħu ma’ sħabhom minn madwar l-Ewropa, jieħdu sehem f’workshops u jżuru l-Parlament Ewropew. Ir-ritratt rebbieħ Malti se jiġi stampat u esebit flimkien mar-ritratti l-oħrajn magħżulin mill-Istati Membri l-oħra tal-UE u r-Renju Unit fl-Info Hub tal-Parlament Ewropew.
Niċċelebraw deċennju tal-EPAS f’Malta
Il-kompetizzjoni kienet parti miċ-ċelebrazzjonijiet li jimmarkaw 10 snin tal-programm EPAS, li għad għandu rwol importanti sabiex jippromwovi l-parteċipazzjoni demokratika u jsaħħaħ il-mod kif iż-żgħażagħ jifhmu l-Unjoni Ewropea. Permezz ta’ inizjattivi bħal dawn, l-istudenti huma mħeġġa jirriflettu fuq valuri Ewropej komuni, u jinvolvu ruħhom b’mod attiv fit-tiswir tal-futur tal-Ewropa.