Jum l-Ewropa reġa' magħna u miegħu l-attivitajiet annwali li jsiru f'Malta biex niċċelebrawh!

L-Uffiċċju tal-Parlament Ewropew f'Malta se jkun fi tliet avvenimenti ewlenin madwar Malta u Għawdex:

• Nhar il-Ġimgħa 8 ta’ Mejju filgħodu mid-9:00 sas-13:00 fil-Belt Valletta, l-Uffiċċju tal-PE f’Malta, flimkien ma’ SEM – Servizzi Ewropej Malta - u r-Rappreżentanza tal-Kummissjoni Ewropea f’Malta, se jorganizzaw għadd ta’ avvenimenti bil-parteċipazzjoni ta’ diversi entitajiet relatati mal-UE. Dawn jinkludu spettakli mużikali mill-Malta Visual and Performing Arts School, logħba interattiva għall-pubbliku, u Treasure Hunt organizzata għall-istudenti tal-Iskejjel Ambaxxaturi tal-Parlament Ewropew (EPAS).

L-entitajiet li se jkunu qed jipparteċipaw ukoll f'dawn l-attivitajiet huma l-Aġenzija tal-Unjoni Ewropea għall-Ażil; is-Servizzi Ewropej tax-Xogħol (EURES); SOLVIT Malta u l-Proprjetà Intellettwali; iċ-Ċentru Ewropew tal-Konsumaturi; l-Unità tal-Intitolament (MFH); EUPA (Europass); Euroguidance; URBACT; Endeavour; Aġenzija Żgħażagħ; il-Bank Ewropew tal-Investiment; u Eurydice.

Fid-9.15 ser tingħata konferenza stampa indirizzata mill-kapijiet tas-SEM, tar-Rappreżentanza tal-Kummissjoni Ewropea f'Malta, tal-Uffiċċju ta' Kollegament tal-Parlament Ewropew f'Malta, u mill-Ministru għall-Fondi Ewropej u l-Implimentazzjoni tal-Programm Elettorali l-Onor. Stefan Zrinzo Azzopardi;

• Nhar il-Ġimgħa 8 ta' Mejju mid-9:00 sat-15:00 fl-Università ta' Malta, l-Uffiċċju tal-PE f'Malta, flimkien ma' JEF Malta, se jorganizza l-edizzjoni annwali tal-Villaġġ Ewropew biex jiċċelebra Jum l-Ewropa fil-Quadrangle. Diversi organizzazzjonijiet tal-istudenti se jkunu qed jirrappreżentaw pajjiżi Ewropej differenti, filwaqt li jesploraw diversi kulturi u tradizzjonijiet Ewropej. Ambaxxati, u entitajiet oħra, bħall-EPLO Valletta nnifsu, se jkunu preżenti biex iwieġbu kwalunkwe mistoqsija fir-rigward tal-UE.   Bejn 12:00 u s-14:00, ser issir diskussjoni ma' akkademiċi residenti li ġejjin mid-Dipartiment tar-Relazzjonijiet Internazzjonali, tal-Politika Pubblika u l-Istitut tal-Istudji Ewropej fejn iż-żgħażagħ ser jinvolvu ruħhom b'mod attiv fi djalogu sinifikanti kontinwu ma' xulxin dwar kwistjonijiet attwali li jaffettwaw l-Unjoni Ewropea. Dan id-dibattitu, bit-titlu “In the Loop with the Group”, se jitmexxa f'format li jippermetti lill-parteċipanti kollha jingħaqdu fil-konverżazzjoni fi kwalunkwe punt u jargumentaw il-perspettiva tagħhom;

• Nhar is-Sibt 9 ta' Mejju mill-10:00 sal-17:00 f'Għawdex, Europe Direct Għawdex qed jorganizza l-avveniment "Jum l-Ewropa Għawdex 2026" fil-Ġonna ta' Villa Rundle fir-Rabat, , b'kollaborazzjoni mal-Ministeru għal Għawdex, bħala parti mill-attivitajiet tal-Fiera tar-Rebbiegħa. Varjetà ta’ fornituri ta’ informazzjoni u servizzi tal-UE se jkunu preżenti biex jaqsmu l-għarfien dwar l-Unjoni Ewropea, ir-rwoli organizzattivi tagħhom, u s-servizzi li joffru. Fost l-oħrajn, Globe Malta se turi l-aħħar proġett tagħha dwar l-importanza tal-ilma, imwettaq b'kollaborazzjoni ma' Europe Direct Gozo. Nature Trust – FEE (Malta), li se tkun qed tipparteċipa wkoll, ser tenfasizza l-isforzi kontinwi tagħha fil-konservazzjoni tan-natura Maltija. L-Iskola tal-Arti Viżwali u tal-Prestazzjoni Għawdex se tippreżenta spettaklu multidixxiplinari li jinkludi drama, żfin, arti viżiva u mużika, inkluż spettaklu live ensemble.

Ingħaqad magħna sabiex niċċelebraw l-UE!